Viðskiptaráðherra áréttar að Evrópusambandsaðild sé ekki á dagskrá

Björgvin G. Sigurðsson, viðskiptaráðherra, viðraði í vikunni þá skoðun
sína að Ísland ætti að ganga í Evrópusambandið og taka upp evru. Skoðanir
hans á Evrópumálunum eru eins og kunnugt er ekki nýjar af nálinni og koma
því síst á óvart. Hins vegar áréttaði Björgvin að einungis væri um að ræða
hans persónulegu skoðun og að aðild að Evrópusambandinu væri ekki á
stefnuskrá ríkisstjórnarinnar.

Forseti framkvæmdastjórnar ESB líkir sambandinu við heimsveldi

"Við erum mjög sérstök smíði sem er einstök í mannkynssögunni. Stundum líki ég Evrópusambandinu sem sköpunarverki við skipulag heimsveldis. Við búum yfir stærð heimsveldis." Þannig mælti José Manuel Barroso, forseti framkvæmdastjórnar Evrópusambandsins, á blaðamannafundi þann 17. júlí sl.

Heimild:
Barroso hails the European 'empire' (Daily Telegraph 18/07/07)

Utanríkisráðherra ítrekar að það sé kostur að standa utan ESB

"Ég hef heyrt í dag hjá fulltrúum þeirra sem sitja á ísraelska þinginu að þeir telja að Ísland geti haft hlutverki að gegna ef að við raunverulega viljum og setjum okkur inn í mál og sýnum áhuga. Og þá ekki síst vegna þess – sem er náttúrlega kannski dálítið merkilegt – að við stöndum utan við allar stórar valdablokkir."

Þetta er meðal þess sem haft var eftir Ingibjörgu Sólrúnu Gísladóttur, utanríkisráðherra, í Morgunblaðinu í gær, en hún er nú á ferð um Miðausturlönd. Stutt er síðan ráðherrann sagði í heimsókn til Afríku að talsverður stuðningur væri á meðal Afríkuríkja við framboð Íslands til öryggisráðs Sameinuðu þjóðanna og að í því sambandi gæti það reynst kostur fyrir Ísland að standa utan Evrópusambandsins.

Utanríkisráðherra: Glufa opin í Mið-Austurlöndum

Ekkert til að semja um

Haft er eftir Olli Rehn, yfirmanni stækkunarmála í framkvæmdastjórn Evrópusambandsins, í þýska dagblaðinu Die Welt í dag að Íslandi yrði tekið fagnandi ef það ákveddi að ganga í sambandið, aðildarviðræður við Íslendinga myndu taka stuttan tíma og litla samninganefnd þyrfti af hálfu þess til að ræða við Íslendinga. Þetta er vitaskuld afar skiljanlegt enda yrði um sama og ekkert að semja. Í öllum aðalatriðum snerist málið um að gangast undir reglur Evrópusambandsins eða ekki.

Olli Rehn: Umsókn Íslendinga um aðild að ESB yrði fagnað

Fjársvik innan ESB kosta 123 milljónir króna hvern virkan dag

Breska dagblaðið The Daily Express greindi frá því í gær að fjársvik í stjórnkerfi Evrópusambandsins kostaði skattgreiðendur innan þess meira en eina milljón punda hvern virkan dag, eða sem samsvarar um 123 milljónum íslenskra króna, samkvæmt tölum frá framkvæmdastjórn sambandsins. "Evrópusambandið heldur áfram að tapa háum fjárhæðum vegna fjársvika. Ef þeir sem ráða ferðinni í fjármálum sambandsins væru við stjórnvölinn á venjulegu fyrirtæki hefðu þeir verið látnir taka pokann sinn fyrir löngu. Evrópusambandið þarf á róttækum umbótum að halda, ekki sífellt meiri völd. Ekki hefur verið gengið frá bókhaldi smbandsins sl. 12 ár og ný vandamál virðast koma upp á yfirborðið í hverjum mánuði," sagði Neil O'Brien, framkvæmdastjóri bresku hugveitunnar Open Europe, af því tilefni.

Heimildir:
EU fraud costs £1million a day (Daily Express 10/07/07)
EU fraud costs £1 million a day (Open Europe 10/07/07)
EU budget black hole (Daniel Hannan 09/07/07)

475 milljarðar króna í áróður

Samkvæmt nýrri breskri rannsókn eyddi Evrópusambandið 3,8 milljörðum punda (475 milljörðum króna) af skattfé á síðasta ári í ýmis konar áróður í því skyni að fá íbúa aðildarríkjanna til stuðnings við sig.

Heimild:
EU pours £3.8bn into 'brainwashing campaign' (Sunday Telegraph 02/07/07)

Utanríkisráðherra segir það kost að standa utan Evrópusambandsins

"Ingibjörg Sólrún segir að sér virðist sem talsverður stuðningur sé við framboð Íslands til öryggisráðs Sameinuðu þjóðanna meðal Afríkuríkja. Að sögn Ingibjargar er stofnun sambandsríkis Afríku mikið rædd á fundinum. Ástæðan sé sú að ráðamenn í Afríku vilji láta meira að sér kveða á alþjóðlegum vettvangi. Þar sem að margir telji nú nauðsynlegt að Afríka verði einhvers konar mótvægi við Bandaríkin og Evrópusambandið geti það verið kostur fyrir Ísland í baráttunni um sæti í öryggisráðinu að vera utan Evrópusambandsins."

Þannig hljóðaði hluti fréttar Ríkisútvarpsins í dag um heimsókn Ingibjargar Sólrúnar Gísladóttur, utanríkisráðherra, til Ghana á leiðtogafund Afríkusambandsins. Það hefur vakið athygli að Ingibjörg, sem verið hefur einn ötulasti talsmaður þess að Ísland gangi í Evrópusambandið, skuli sjá jákvæðar hliðar á því að standa utan þess. Jafnvel þó framboð Íslands til öryggisráðs Sameinuðu þjóðanna sé vissulega afar umdeilt hér á landi.

Forystumenn ESB viðurkenna að stjórnarskráin muni í raun halda sér

Leiðtogar aðildarríkja Evrópusambandsins komust að samkomulagi á dögunum um nýtt fyrirkomulag sem ætlað er að koma í stað stjórnarskrár sambandsins sem felld var í þjóðaratkvæðagreiðslum í Hollandi og Frakklandi í byrjun sumars 2005. Fyrirkomulagið er þó ekki nýrra en svo að leiðtogarnir hafa strax viðurkennt opinberlega að í öllum meginatriðum sé um nákvæmlega sama fyrirkomulag að ræða og kveðið var á um í stjórnarskránni.

"Undirstöðustriðin úr stjórnarskránni hafa haldið sér að mestu leyti." Angela Merkel, kanslari Þýskalands í spænska dagblaðinu El Pais 25. júní sl.

"Stóran hluta af innihaldi stjórnarskrár Evrópusambandsins er að finna í hinum nýja sáttmála." José Luis Rodríguez Zapatero, forsætisráðherra Spánar, í El Pais 25. júní sl.

"... til allrar hamingju hafa þeir ekki breytt aðalatriðunum [úr stjórnarskránni] - 90% af þeim eru enn þarna." Bertie Ahern, forsætisráðherra Írlands, í írska dagblaðinu Irish Independent 24. júní sl.

"Það góða er að öll táknrænu atriðin [úr stjórnarskránni] eru farin á meðan það sem skiptir máli - kjarninn - er eftir." Anders Fogh Rasmussen, forsætisráðherra Danmerkur, í danska dagblaðinu Jótlandspóstinum 25. júní sl.

"Það hefur engu verið breytt frá upphaflega stofnanafyrirkomulaginu." Astrid Thors, Evrópumálaráðherra Finnlands, í TV-Nytt 23. júní sl.

Hótanir um ofbeldi í vöggu lýðræðis!!!

Evrópusambandið telur sig vöggu og verndara lýðræðis. Þeir sem hvað harðast eru talsmenn sambandsins segja hið sama. Gagnrýnendur Evrópusambandsins hafa á hinn bóginn hamrað á því að lýðræði sé fyrir borð borið og þátttaka almennings í störfum og stefnumótun sé hverfandi.  Nú hafa leiðtogar ESB-ríkjanna setið á rökstólum og rætt um framtíðina. Efasemdum Pólverja og sum part Breta er mætt með hótunum og ofbeldi. Getur þessi "vagga lýðræðis" staðið undir nafni?

Grein Árna Þórs Sigurðssonar, alþingismanns, má lesa í heild á bloggsíðu hans.

Reynt að komast hjá þjóðaratkvæði um stjórnarskrána

Fróðlegt er að lesa um undirbúning leiðtogafundar ESB-ríkjanna, sem hefst í dag í Brussel. Í einhverju blaðanna sá ég, að Þjóðverjar séu að búa sig undir, að ekki takist að ná samkomulagi um breytingar á stjórnskipan ESB eða bjarga leifunum af stjórnarskrársáttmálanum, sem Frakkar og Hollendingar felldu í þjóðaratkvæðagreiðslu fyrir tveimur árum.

Anders Fogh Rasmussen, forsætisráðherra Dana, segist ætla að halda þannig á málum, að ekki þurfi að efna til þjóðaratkvæðagreiðslu um niðurstöðuna. Tony Blair talar á sama veg fyrir sína hönd. Ef ríkisstjórnir Danmerkur og Bretlands komast hjá þjóðaratkvæðagreiðslu, verður hún líklega ekki neins staðar innan ESB. Svo virðist sem ráðamenn í ESB-ríkjunum óttist ekkert meira en að þurfa að leggja málefni tengd ESB undir kjósendur sína. Í Finnlandi sýna kannanir meira að segja, að meirihluti manna er orðinn andvígur ESB. Finnska þingið samþykkti hins vegar stjórnarskrársáttmála ESB á sínum tíma.

Tekið af heimasíðu Björns Bjarnasonar, dómsmálaráðherra.