Rannsókn ársins kynnt í RÚV

 Landsmenn fengu sérkennilega sendingu frá Ríkisútvarpinu í þættinum Silfrið 13. nóvember sl.  Þar talaði Maximilian Conrad, prófessor við Háskóla Íslands, en Evrópusambandið hefur keypt hann og marga aðra til að rannsaka upplýsingaóreiðu fyrir sig. 

 

Hvernig stendur á því að ákvörðun Evrópusambandsins um að kaupa rannsókn verður að langri dagskrá í sjónvarpi Ríkisútvarpsins?  Rannsóknin er varla hafin og engar niðurstöður liggja fyrir.  Sjónvarpið segir almennt lítið frá niðurstöðum  vísindarannsókna, en loks þegar tími gefst þá er hann notaður til að ræða um rannsókn sem ekki hefur farið fram.  Megum við næst búast við að skáldin komi í bókmenntaþætti til að segja frá kvæðum og sögum sem þau ætla að fara að skrifa?

 

Rannsóknaverkefnið virðist að einhverju marki snúast um lygar, blekkingar og rangfærslur.  Röngum upplýsingum sé miðlað af illum ásetningi, staðreyndir séu, í huga sumra, valkvæðar og hætt sé við skipbroti lýðræðis.   Maximilian hefur áhyggjur af því að fólk láti sér staðreyndir í léttu rúmi liggja og greini ekki milli þess sem er rétt og rangt. Þá fjallar hann um ill öfl sem eru andsnúin lýðræðinu og framsækinni pólitík.  Allt verður þetta til vísindalegrar skoðunar næstu árin.

 

Það vekur athygli að verkefnið er hýst í þeim hluta Háskólans þar sem fjöldi manna barðist um á hæl og hnakka til að koma Íslandi í Evrópusambandið fyrir örfáum árum, og óvíst er að menn hafi látið af þeirri baráttu.  Með inngöngu í Evrópusambandið væri verið að stíga risaskref í átt frá lýðræði.  Öll barátta Evróputrúboðsins var þéttasti vefur blekkinga og ósanninda sem ofinn hefur verið í stjórnmálum á Íslandi.   Maximilian mun því ekki þurfa að fara úr húsi til að finna nægan efnivið til að rannsaka.

 

Í augum utanaðkomandi hlýtur framkvæmd þessa verks að vera öfugsnúin, svolítið eins og að manna stjórn bindindisfélags með fastagestum af barnum.

 

Athygli vekur að viðtalið fer fram á ensku, en viðmælandinn hefur þó búið á annan áratug á Íslandi.  Hvernig skyldi standa á því?  Fannst enginn í verkefninu sem vildi tala íslensku?  Felast skilaboð í því að viðmælandinn tali ensku með þýskum hreim?

 

Of mikið, en of lítið

Fyrir tíma netsins var auðveldara en nú er að komast upp með að vera í mótsögn við sjálfan sig.  Nú er það erfitt, ef einhver nennir á annað borð að hlusta eða lesa það sem menn og flokkar hafa að segja. Hjörtur nennti og bendir kurteislega á mótsögnina í því að vilja minnka ríkisbákn og ganga í Evrópusambandið, en hvort tveggja segjast menn vilja í flokki sem nefndur er Viðreisn.  Það er eins og að berjast fyrir meiri þrifnaði með kúk í buxunum. 

https://www.fullveldi.is/?p=21809

Sokkar í erfitt verkefni

Nú er prjónað á menn sem fást við „erfið verkefni“.

Hin erfiðu verkefni eru að höggva mann og annan og leggjast svo sjálfir á höggstokkinn.   Kannski draga mennirnir síður af sér við verkin ef þeir eru í hlýjum sokkum.  Kannski hættu þeir að drepa og færu heim til sín ef þeir ættu ekki góða sokka.

Ótaldar kynslóðir evrópskra kvenna hafa keppst við að prjóna á menn sem hafa hamast hverjir á öðrum í frostinu.  Svo virðist sem þessi þáttur í evrópskri menningu hafi borist til Íslands.  Það er kannski ekki skrýtið í ljósi þess að nú á Evrópusambandið í stríði, svo vitnað sé í Borrell, utanríkisráðherra sambandsins.   Hans stríð telja sumir sitt stríð.  Það sama fólk mundi eflaust ekki telja eftir sér að prjóna sokka á íslenska drengi við mannfórnir í framtíðarríkinu.

https://www.mbl.is/frettir/innlent/2022/09/18/prjona_fyrir_kalda_faetur_i_ukrainu/

Vísitasía frá Evrópusambandinu

Það er venja að vísitera sóknirnar öðru hverju, jafnvel þær sem smæstar og fjarlægastar eru. Þá er sendur maður í sparifötum og nýjum skóm með embættisbréf frá höfuðbólinu. 

Maros Sefcovic varaforseti framkvæmdastjórnar Evrópusambandsins kom í heimsókn um daginn.  Hann talaði til alþýðu í Háskólanum og var mál manna að hann hefði verið langorður.  Fátt nýtt kom þó fram á hinu opna málþingi, annað en að það hlyti að hafa verið erfitt að draga fram lífið á Íslandi áður en EES-samningurinn kom til sögunnar. 

Aðspurður um hvort ekki væri tímabært að hætta að leggja toll á fiskafurðir frá Íslandi, eins og á við um t.d. fisk frá Kanada, hafði hann það helst að segja að vandamálið væri að Íslendingar fiskuðu svo mikið.

Þetta Evrópusamband er undarlegur söfnuður, það er ekki ofsagt.

https://www.stjornarradid.is/efst-a-baugi/frettir/stok-frett/2022/10/20/Varaforseti-framkvaemdastjornar-ESB-fundar-med-utanrikisradherra/

 

Tíðindalaust á vígstöðvunum

Enn eru færðar mannfórnir í A-Evrópu.  Fáir tala um að mál sé að snúa sér að öðru.  Allt bendir til þess að beggja vegna víglínunnar séu menn almennt sammála um að halda áfram að drepa hverja aðra þangað til ásættanleg niðurstaða fæst.  Vígamennirnir virðast ekki hafa hana í augsýn. 

Raunar er drjúgur hluti Evrópumanna á þessari skoðun, enda er hún í ljómandi samræmi við sögu Evrópu frá örófi.  Þessu liði er ekki sjálfrátt núna, frekar en árið 1914. 

Hlutverk Íslendinga er vitaskuld að reyna að bera klæði á vopnin, en gæta þess umfram allt að þetta stríðsfólk fái aldrei nein völd á Íslandi.  Enginn veit hver örlög Íslendinga yrðu ef svo færi.

 

https://news.gallup.com/poll/403133/ukrainians-support-fighting-until-victory.aspx

https://carnegieendowment.org/2022/09/07/my-country-right-or-wrong-russian-public-opinion-on-ukraine-pub-87803

 

 

 

 

Fullveldið og íslenskan

Ármann Jakobsson heitir formaður Íslenskrar málnefndar.  Hann telur fullveldi Íslands greinilega mikils virði og ræðir málið með hliðsjón af íslenskukennslu fyrir innflytjendur.  Hann segir:

Þar með er sjálfstæði Íslands auðvitað ógnað því að ef íslensk tunga og íslensk menning hverfur fækkar mjög rökunum fyrir því að þessi fámenna þjóð sé sjálfstæð. Hér fer því ótvírætt mesta ógn sem hefur stafað að sjálfstæði Íslands seinustu áratugi.

Þegar horft er til annarra Evrópulanda opinberast að á Íslandi er pottur brotinn í þessum málum.  Í öðrum löndum sem vinsælt er að nota til samanburðar þykir nefnilega fjarri því sjálfsagt að ávarpa ókunnuga á ensku ef þeir líta öðruvísi út en algengast er.

Það verður vonandi mikill samhljómur í samræðum um þetta mál í næstu fjölskylduboðum formannsins.

 

https://www.visir.is/g/20222326428d/tungu-malid-er-lykillinn-ad-full-veldinu

Hindrar samningur um frjálsa verslun frjálsa verslun?

Hjörtur J. Guðmundsson skrifar í Morgunblaðið í dag um hvernig EES-samningurinn leggur stein í götu frjálsrar verslunar við útlönd. 

Margt bendir til að Íslendingum farnist best þegar verslun er frjáls.  Hér verður því ekki hjá því komist að staldra við og hugsa sinn gang.

Það gerir Hjörtur og bendir á leið:

 Hins vegar er leið út úr þessum aðstæðum, víðtækur fríverzlunarsamningur við Evrópusambandið. Leið sem ríki heimsins fara allajafna þegar samið er um milliríkjaviðskipti og felur, ólíkt EES-samningnum, ekki í sér vaxandi framsal valds yfir eigin málum og vaxandi hindranir í vegi viðskipta við aðra heimshluta.

http://fullveldi.is/?p=1531

Ragnar Arnalds - minning

Sigurður Þórðarson ritar fyrir hönd Heimssýnar

 

Sagt er að skipta megi fólki í tvo hópa; þá sem vaxa í viðkynningu og hina. Ragnar Arnalds, sá sem við kveðjum hér í hinsta sinn, bar með sér háttvísi og velvild til allra í fyrstu viðkynningu, engu að síður er hann að mati þeirra sem þekktu hann best í fyrrnefnda hópnum.

Strax á menntaskólaárum sínum í MR lét Ragnar mikið að sér kveða í pólitískri umræðu. Þjóðvarnarflokkurinn og málgagn hans Frjáls þjóð var hans fyrsti vettvangur. Hann þótti lipur penni en ekki síst rökfastur ræðumaður, þannig að eftir því var tekið. Það var herlaust Ísland og útfærsla landhelginnar sem áttu hug hans allan. Árið 1962 er Ragnar ritstjóri Frjálsrar þjóðar. Um það leyti kom Jónas Árnason að máli við Ragnar og bað hann að koma með sér í fundaherferð um land allt, til að berjast fyrir þeim málum sem brunnu á þeim Ragnari, sem fyrr er getið. Ragnar tók þessari áskorun en sinnti þó jafnframt ritstörfum, enda sló hjartað hratt í okkar unga manni. Svo mikill rómur var gerður að fundaherferð þeirra félaga að Ragnari var boðið fyrsta sæti á lista Alþýðubandalagsins í Norðurlandskjördæmi vestra, þar sem hann náði kjöri árið 1963, þá næstyngstur þingmanna sem kjörnir höfðu verið á Alþingi. Sjálfur átti ég því láni að fagna að vera nemandi Ragnars í stærðfræði fyrsta árið sem hann kenndi við Gagnfræðaskóla Vesturbæjar. Þessi tilviljun réð kannski nokkru um að löngu síðar, fyrir áeggjan Ragnars, kynnti ég mér sjálfstæðisbaráttuna og ákvað strax að leggja henni mitt lið.

Að loknum farsælum 32 ára ferli sem atvinnustjórnmálamaður ákvað Ragnar að sinna hugðarefnum sínum utan Alþingis en þar var af fjölmörgu að taka á sviði stjórnmála, lista og menningar. Ný fullveldisbarátta var framundan og þá var Ragnar Arnalds ekki fjarri vettvangi. Þann 27. júní 2002 hafði Ragnar forgöngu um að stofna Heimssýn, hreyfingu sjálfstæðissinna í Evrópumálum. Hreyfingin er þverpólitísk samtök fólks sem vill að Ísland haldi sjálfstæði sínu fyrir utan Evrópusambandið, sem er tollamúrabandalag sem reynir að skipta á aðgangi að mörkuðum gegn aðgengi að auðlindum.
Á Íslandi býr fámenn þjóð sem ólíkt Evrópusambandinu býr að umtalsverðum auðlindum í hafi auk landgæða. Það var hvalreki fyrir Heimssýn að Ragnar Arnalds skyldi leiða félagið í upphafi enda hafði hann yfirburðaþekkingu á tollasamningum, t.a.m. vegna aðkomu sinnar að bókun 6; sem hélt aftur af tollum á sjávarafurðum til ESB, og síðar sem fjármálaráðherra. Á forystuárum sínum hjá Heimssýn hafði Ragnar forgöngu um að flytja til landsins fræðimenn á sviði þjóðaréttar og fjármála sem dýpkuðu þekkingu okkar og skilning á því hvað í húfi væri. Meðal þeirra má nefna formann samninganefndar Norðmanna, sem tvisvar sóttu um aðild að ESB, en þjóðin hafnaði aðildinni jafnoft. Hann skýrði skilmerkilega hvaða hætta felst í því að afhenda ESB fiskveiðilögsöguna til eignar, þó við gætum fengið aðlögunar- og umþóttunartíma. Það var Ragnar Arnalds sem valdi félaginu nafnið Heimssýn. Skýring á nafninu kemur fram í fyrstu yfirlýsingu félagsins, sem birt var í öllum helstu prentmiðlum landsins:

Íslendingar hafa á tæpri öld fest sig í sessi sem sjálfstæð þjóð með öflugt atvinnu- og menningarlíf þar sem velferð þegnanna er tryggð. Einstakur árangur fámennrar þjóðar væri óhugsandi nema fyrir það afl sem felst í sjálfstæðinu. Við undirrituð leggjum áherslu á vinsamleg samskipti og víðtæka samvinnu við aðrar þjóðir í Evrópu og heiminum öllum en teljum það ekki samrýmast hagsmunum Íslendinga að gerast aðilar að Evrópusambandinu. Við hvetjum til opinnar umræðu um Evrópu- og alþjóðasamstarf á þessum grunni og höfum stofnað samtök sem bera heitið Heimssýn, hreyfing sjálfstæðissinna í Evrópumálum.

 

Við félagar Ragnars og sporgöngumenn í Heimssýn lútum höfði af virðingu og þakklæti fyrir vináttu hans og óeigingjarnt starf í þágu íslensku þjóðarinnar. Nú er skarð fyrir skildi í sjálfstæðisbaráttu Íslands. Við söknum hans sárt, en meiri er missir lífsförunautar hans Hallveigar Thorlacius, barna þeirra og barnabarna. Stjórn Heimssýnar sendir þeim öllum okkar innilegustu samúðaróskir og biður þeim blessunar.