Gylfi Zoëga, prófessor í hagfræði, útskýrir sjúkdómsmerki evrusvæðisins

Evr­ópski seðlabank­inn ákvað í gær að halda stýri­vöxt­um bank­ans óbreytt­um. Stýri­vext­ir bank­ans, sem gilda fyr­ir evru­svæðið, verða því áfram 0,05%. Bank­ar verða að greiða 0,2% vexti fyr­ir að geyma fjár­muni hjá seðlabank­an­um. Á fundi efnahags- og viðskiptanefndar Alþingis með fulltrúum peningastefnunefndar Seðlabanka Íslands á mánudag sagði Gylfi Zoëga, prófessor í hagfræði við Háskóla Íslands og peningastefnunefndarmaður, að ástandið hér á landi væri mun heilbrigðara en á evrusvæðinu þar sem vextirnir væru í kringum núllið.

Eyjan.is endurbirtir útskýringar prófessorsins á fundinum:

Þessir núll prósent vextir og mínus vextir eru dæmi um að það er eitthvað mikið að í þessum löndum. Og það sem er að er mikið atvinnuleysi, skortur á eftirspurn eða, eins og í Danmörku, þetta gríðarlega innflæði, það er áhlaup á dönsku krónuna. Menn eru að veðja á að þeir gefist upp og láti hana hækka. Á evrusvæðinu er það gríðarlegt atvinnuleysi í ýmsum löndum. Bretar eru að reyna að ná upp eftirspurn með þessum lágu vöxtum og á sama tíma eru þessi lönd, með þessari vaxtastefnu, að blása út eignaverðbólur – fasteignaverðbólur, hlutabréfaverðbólur, aukna skuldsetningu heimila.

Óbreyttir stýrivextir á evrusvæðinu

Helmingur Breta vill ganga úr ESB

Breskir kjósendur skiptast í um jafn stóra hópa þegar þeir eru spurðir hvort Bretland eigi að segja sig úr Evrópusambandinu.

Svo segir á visir.is.

Þar segir enn fremur:

Um þrjár vikur eru nú til þingkosninga í landinu. David Cameron forsætisráðherra hefur heitið þjóðaratkvæðagreiðslu um framtíð sambands Bretlands og ESB fyrir lok ársins 2017, vinni flokkurinn sigur í kosningunum.

Í nýrri könnun Populus sem birtist í blaðinu Financial Times kemur fram að 39 prósent aðspurðra myndi kjósa að Bretland yfirgæfi sambandið, en 40 prósent segjast styðja áframhaldandi aðild.

Cameron segist sjálfur vilja að Bretland eigi áfram aðild að sambandinu, þó með breyttu sniði. Hann segist ekki útiloka neitt, sjái hann ekki þær breytingar á sambandinu sem honum hugnast, þar á meðal aðgerðir til að draga úr straumi flóttafólks til Bretlands.

Íhaldsflokkur Cameron mælist með nokkurt forskot á Verkamannaflokkinn í könnunum, en þingkosningar fara fram þann 7. maí næstkomandi.

Pappírshrekkur gegn stefnu Seðlabanka evrunnar

Það er illa gert að hrekkja fólk með þessum hætti en Mario Draghi, seðlabankastjóra evrunnar, brá illilega þegar ung kona stökk upp á borðið sem hann sat við á fundi áðan og dreifði yfir hann pappírsrusli. Jafnframt öskraði konan að binda ætti enda á harðstjórn Seðlabanka evrunnar.

Þessi atburður átti sér stað í dag. 

Mót­mæl­end­ur hafa sakað bank­ann um að reyna að keyra í gegn harka­leg­ar aðhaldsaðgerðir á evru­svæðinu, sér­stak­lega í Grikklandi, eins og segir í frétt mbl.is.

 

Mótmælandi veittist að Mario Draghi

Þrýstihópar í ESB valda hættu á spillingu

Nýleg skýrsla ber með sér að hætta sé á því að þrýstihópar, sem eru öflugir innan Evrópusambandisns, valdi efnahagslegri spillingu innan sambandsins. Þess vegna sé mikilvægt fyrir ríkisstjórnir og stofnanir að setja skýrar reglur um starfsemi þrýstihópa.

Fram kemur í skýrslunni að verst sé ástandið í Ungverjalandi og á Kýpur en skást í Slóveníu.

Það er þekkt að öflugir þrýstihópar sem starfa í Strasbourg og Brussel hafa mun meiri áhrif á lagasetningu í Evrópusambandinu en almennir kjósendur.

Fé var borið á Íslendinga, segir Ögmundur

Ögmundur Jónasson, þingmaður Vinstri grænna, tók það fram í umræðum á Alþingi í kvöld um tillögu Samfylkingar og fleiri um þjóðaratkvæðagreiðslu um framhald viðræðna um inngöngu Íslands í ESB að hann vildi breyta spurningu sem lagt er til að lögð verði fyrir þjóðina þannig að spurt yrði beint um afstöðu til aðildar að ESB. 

Jafnframt sagði Ögmundur að þeir sem samþykkt hefðu tillögu um umsókn um aðild að ESB árið 2009 hefðu verið hafðir að fíflum með því að látið var í veðri vaka að umsóknarferlið tæki ekki nema 18-24 mánuði. Umsóknarferlið hefði hins vegar reynst miklu víðfeðmara og langdregnara en nokkur hefði búist við. 

Þá ítrekaði og undirstrikaði Ögmundur að ekki hefði verið um neinar venjulegar aðildarviðræður að ræða heldur hefði komið í ljós að þetta voru aðlögunarviðræður (eins og lýst hefur verið hér í þessu bloggi nýlega með vísan í framvinduskýrslur) og að aðilar í stjórnkerfinu hefðu verið keyptir með aðlögunarstyrkjum til að hraða aðlöguninni sem mest.

Ögmundur sagði í því efni að það hefði verið borið fé á Íslendinga.

Vill Samfylkingin að áfram verði borið fé á Íslendinga?

 

Icesave-þvingun í skjóli umsóknar að ESB

Það er gott að rifja það upp að ein af þeim svokölluðu aðlögunum sem ESB krafðist eftir að Ísland hafði sótt um aðild að ESB var sú að íslenska ríkið ábyrgðist Icesave-skuld bankanna. Þetta má lesa um í svokölluðum framvinduskýrslum sem gerðar voru um viðræður við ESB. Þannig notaði ESB umsókn Íslands um inngöngu í ESB til að þvinga fram ábyrgð íslenskra skattgreiðenda á Icesave-skuld íslenskra banka.

Sjá m.a. hér: Iceland 2010 Progress Report.

Í skýrslunum er meðal fjallað um aðlögun í fjármálageiranum og þar er ítrekað komið inn á að engin framþróun hafi átt sér stað í Icesave-málinu.

ESB krefst nýrrar þjóðaratkvæðagreiðslu í Sviss

ESB krefst nýrrar þjóðaratkvæðagreiðslu í Svíss um innflytjendamál, ári eftir að Svisslendingar kusu um málið og niðurstaðan var ekki ESB að skapi. ESB krefst þess að frjáls för vinnuafls sé ófrávíkjanleg regla og að Sviss verði að samþykkja þá reglu ef landið vilji vera í eðlilegum samskiptum við ESB.

Norska blaðið Dagens Næringsliv segir frá þessu. Frosti Sigurjónsson þingmaður skrifar um þetta á fésbók sinni og segir (leturbr. Heimssýn): 

ESB ætlar ekki að una niðurstöðu þjóðaratkvæðagreiðslu sem fram fór í Sviss um innflytjendalöggjöf. ESB krefst þess að þjóðaratkvæðagreiðsla verði endurtekin, enda gáfu kjósendur í Sviss „rangt svar“ að mati ESB. Engin þjóðaratkvæðagreiðsla fór fram í ESB um innflytjendalöggjöf, hún er samin af andlitslausum embættismönnum sem enginn kaus. Þjóðþingin stimpluðu lögin möglunarlaust væntanlega til að lenda ekki veseni eða því að sökuð um slóðaskap í innleðingakeppninni. Hver á að setja lögin í Sviss? Embættismenn ESB í Brussel eða kjósendur í Sviss?

Meirihluti Íslendinga vill í raun draga umsóknina til baka

Niðurstaða þessarar skoðanakönnunar segir okkur það eitt að meirihluti Íslendinga vilji í raun draga umsóknina um aðild að Evrópusambandinu til baka. Gera má ráð fyrir að margir sem svari því játandi að Ísland sé umsóknarríki séu í þeim flokki sem vill fá að kíkja í pakkann en séu í raun andvígir inngöngu í ESB. Miðað við þetta er alveg ljóst að það er skynsamlegast að fylgja því eftir að umsóknin verði formlega og tryggilega dregin til baka svo að Ísland verði tekið af lista yfir þau ríki sem skráð eru sem umsóknarríki að ESB.

Sjá hér upplýsingar um könnun sem MMR gerði fyrir Andríki.

Í frétt mbl. kemur eftirfarandi fram:

41,6% Íslend­inga vilja að Ísland sé um­sókn­ar­ríki að ESB en 42,5% eru því and­víg. Þetta kem­ur fram í niður­stöðu viðhorfs­könn­una sem MMR gerði fyr­ir þjóðmála­fé­lagið And­ríki.

15,9% tóku ekki af­stöðu. Ef aðeins er horft til þerra sem tóku af­stöðu eru 50,5% and­víg því að Ísland sé um­sókn­ar­ríki að ESB en 49,5% fylgj­andi.

Í könn­un­inni var spurt: Vilt þú að Ísland sé um­sókn­ar­ríki að Evr­ópu­sam­band­inu. Fram kem­ur að vik­mörk við bæði já­kvæð og nei­kvæð svör við spurn­ing­unni séu 3,3%. Alls tók 891 af­stöðu, þar af svaraði 441 ját­andi og 450 neit­andi.

Þjóðin klofin í afstöðu til ESB-umsóknar

Guðmundur Steingrímsson vonsvikinn með svör Seðlabankans um evruna

Guðmundur Steingrímsson þingmaður reyndi ítrekað að fá fulltrúa peningastefnunefndar Seðlabankans, sem fundaði á opnum fundi með efnahags- og viðskiptanefnd i morgun, til að taka undir það sjónarmið í nýlegri skýrslu KPMG að auðveldar væri að losna við fjármagnshöft með evru. Fundurinn var í opinni útsendingu á vef Alþingis.

Þegar fulltrúar peningastefnunefndar Seðlabankans gátu ekki tekið undir sjónarmið Guðmundar lýsti hann yfir sérstökum vonbrigðum með svör þeirra.

Þvert á móti kom fram hjá fulltrúum peningastefnunefndar að losun fjármagnshafta væri algjörlega óháð hugsanlegri inngöngu í ESB og mögulegri upptöku evru í framhaldinu.

Ólund Guðmundar yfir svörum fulltrúa peningastefnunefndar Seðlabankans er staðfesting á því að skýrsla KPMG um málið fyrir skemmstu er gagnslaus.

 

Maltverjar samþykkja í þjóðaratkvæðagreiðslu að veiða farfugla í net

Maltverjar gengu í gær að kjörborði og kusu um það hvort leyfa ætti veiðar á farfuglum í net. Veiðar af þessu tagi hafa verið hefðbundnar á Möltu en mikil barátta hefur verið gegn þeim síðustu áratugi og umhverfisyfirvöld í ESB hafa verið á móti þeim. Maltverjar fundu þó glufu í lögum sambandsins og ríkisstjórnin lét þjóðina kjósa um framhaldið. Maltverjum finnst mörgum hverjum að ESB eigi ekki að vera að skipta sér af gömlum og góðum siðum á Möltu eins og þessum fuglaveiðum.

Meirihluti landsmanna, 50,4% samþykktu í gær, laugardag, að leyfa veiðarnar áfram. Þar munaði talsvert um að íbúar á norðureynni, Gozo, studdu veiðarnar áfram í ríkum mæli.

Maltverjar geta því áfram veitt lóur og aðra farfugla á vorin og haustin í net þegar farfuglarnir tylla sér á þessa klettaeyju í Miðjarðarhafi á löngum ferðalögum til eða frá varpstöðum.

Niðurstaða þjóðaratkvæðagreiðslunnar hefur strax vakið upp hörð viðbrögð meðal náttúruverndarsinna og hvetja sumir þeirra til þess að Malta verði sniðgengin í viðskiptum.